عندما يوضع الذكاء الاصطناعي في يد الغباء الطبيعي… تحدث المعجزة الكونية!
بقلم الاعلامية نرجس قدا
خلّوني أقول لكم حاجة بصراحة…
إحنا عايشين في زمن الذكاء الاصطناعي، يعني المفروض زمن العقول الخارقة.
بس اللي شايفاه قدامي؟ إن في ناس استخدمت التكنولوجيا عشان تطوّر عقلها، وناس استخدمتها عشان “تريّحه من التفكير نهائيًا”!
أنا كل يوم بشوف مواقف تخلي الواحد يضحك ويعيّط في نفس الوقت.
واحد داخل يسأل:
“عايز أبقى ناجح في أسبوع.”
الذكاء الاصطناعي يقوله: تعلّم، صبر، تخطيط، شغل مستمر.
هو يقرأ أول كلمة بس: “تخطيط”، ويقفل الصفحة ويقول: خلاص… خططت في دماغي!
وواحدة تقول:
“اكتب لي بوست مؤثر.”
تنشره زي ما هو، بنفس الأخطاء، بنفس التنسيق، وبنفس الختم العبقري في الآخر:
“تمت الكتابة بواسطة الذكاء الاصطناعي”.
يعني فضحت نفسها بنفسها… وعايزة لايكات كمان!
تعالوا بقى على المدارس والجامعات…
الطالب اللي كان بيغش من ورقة صغيرة، بقى دلوقتي بيغش من سوبر كمبيوتر.
والأستاذ اللي كان بيصحّح بالقلم الأحمر، بقى بيقول:
“الفقرة دي شُفتها قبل كده… غالبًا عند الطالب اللي قاعد جنبك!”
الذكاء الاصطناعي اتعمل عشان يساعد الإنسان يفكّر أحسن،
بس الغباء الطبيعي قال: لا، خلّيه يفكّر بدالي خالص.
وهنا بتحصل المعجزة:
إنسان معاه أقوى أداة في التاريخ… ولسه مش عارف يكتب اسمه صح في الإيميل.
والأجمل بقى؟
نفس الشخص ده تلاقيه بيقول بكل ثقة:
“التكنولوجيا بتدمّر العقول!”
وأنا ببص وأقول في سري:
لا يا حبيبي… التكنولوجيا بس كشفت اللي كان مستخبي.
خلّوني أختصرها لكم:
الذكاء الاصطناعي زي المرآة.
لو عقلك منوّر، هيكبّر نورك.
ولو عقلك مطفي… هيطلع العتمة على شاشة HD
المعجزة الحقيقية مش إن عندنا ذكاء اصطناعي،
المعجزة إننا لسه مستنيين الغباء الطبيعي يعمل تحديث… ولكن للأسف يمكن التحديث يتأخر شوية، “شيء مضحك”
الاعلامية . نرجس قدا
