سلسلة نوستالجيا
نوستالجيا | كوباية الشاي بعد العشاء
نرمين بهنسي
الشعوب.. زمان…كانت كوباية الشاي بعد العشاء مش بس شاي.
كانت بداية اللمة…
الحدوتة، والنكتة اللي مافيش فيها ولا حاجة مضحكة… بس نضحك.
كنا بنقعد سوا، نحكي عن يومنا، نشتكي ونطبطب،
نقول أسرار صغيرة ما تخوفش… بس بتحسسنا إننا قريبين.
كوباية الشاي دي كانت بتدفّي أكتر من البطن…
كانت بتدفّي القلوب.
دلوقتي؟
كل واحد بيشرب لوحده…
قدامه موبايله، أو أفكاره، أو خيبته.
وبقت “اللمة” موعد نأجّله…
و”الحكي” حاجة نكسف منها.
رجّعوا كوباية الشاي بعد العشاء…
مش علشان الشاي،
علشان نرجع نحس ببعض… قبل ما ننسى طعم الدفا.
